CONTOMAR

Información sobre o Contomar

2008-09-29T00:01:00.005+02:00

A partir de agora e por razóns de operatividade, informaremos sobre as actividades do Contomar desde o blog central de Espazo Lectura. Xa que logo, desde aquí daremos noticia das previsións de todas as sesións e do acontecido nelas. Seguiremos informando, pero desde aquí. Moitas grazas e desculpade as molestias.

¿Queres información sobre as actividades do Contomar? Pulsa aquí.

Volve o Contomar

2008-09-24T00:01:00.002+02:00

A partir do luns 6 de outubro, Espazo Lectura levará de novo as sesións semanais do Contomar á Biblioteca Municipal de Gondomar. Estamos a preparar unha sesión especial da que axiña daremos noticias. Como o pasado ano, será os luns ás 18 h., favorecendo así un horario xa coñecido e refrendado polos nenos e nenas asistentes e as súas nais e pais. Esperámosvos.

Despedímonos ata o outono

2008-05-26T23:26:00.000+02:00

O luns 26 de maio celebrouse na Biblioteca Municipal de Gondomar a última sesión do Contomar deste curso. O programa semanal de contacontos que promove Espazo Lectura rematou a súa terceira tempada de existencia cunha sesión na que, tal e como anunciamos, celebramos o cumprecontos dos oito nenos e nenas do Contomar que fan anos durante o verán; contamos a historia As dentaduras de Paco Palma e agasallamos os nenos socios do Contomar cun diploma de asistencia. As fotos son da derradeira sesión deste exercicio. No outono, volveremos puntualmente á nosa cita con novas ideas e con enerxía renovada. Ata entón.

Este luns, a sesión de despedida

2008-05-25T01:04:00.002+02:00

Como nos anos anteriores, o próximo luns celebraremos a última sesión do Contomar por esta tempada. Volveremos novamente en setembro. A última sesión será o 26 de maio, coma sempre ás 18:00h, na Biblioteca Municipal de Gondomar. O programa semanal de contacontos que promove Espazo Lectura despídese así nesta súa terceira tempada cunha sesión na que celebraremos o cumprecontos dos oito nenos e nenas do Contomar que fan anos durante o verán; contaremos a historia As dentaduras de Paco Palma e agasallaremos os nenos socios do Contomar cun diploma de asistencia.

O Contomar botou a andar no mes de febreiro do 2006 e mantívose activo até a actualidade, dando lugar ao nacemento da asociación de fomento da lectura Espazo Lectura que puxo en marcha nestes últimos meses novas propostas de dinamización como o club de lectura compartida Lendo contigo ou a campaña Bookcrossing no Val Miñor. Neste último curso contáronse case 200 contos nas 30 sesións celebradas, ás que asistiron unha media de 35 nenos e nenas por sesión, cun total de 70 nenos que se fixeron socios da actividade.

Tamén celebramos SESIÓNS ESPECIAIS con motivo dalgunhas das datas sinaladas no Calendario da Lectura (Día da poesía, Día do Teatro, Día do Libro, Día das Letras Galegas, etc.), nas que procurabamos agasallar os nenos e nenas con contos e propoñer algunha actividade especial. Durante este curso tamén se fixeron outro tipo de sesións especiais en que contamos coa presenza de convidados como a ilustradora Chus Ferrín ou o grupo de música e teatro Migallas.

AS SESIÓNS realizáronse sempre con libro xa que o obxectivo da actividade é a promoción da lectura. Pretendemos, polo tanto, que vexan que esas historias que lles gustan están nos libros, e faise fincapé nos nomes dos autores e dos ilustradores, procurando que a selección semanal teña en conta distintos tipos de propostas de libro infantil. Durante estes dous anos e medio fomos chamados por diversos centros de ensino do Val Miñor para realizar sesións nas escolas e colexios.

Con esta actividade Espazo Lectura pretende ofrecer en Gondomar un lugar estable de encontro cos libros e a lectura no que as familias teñen un papel fundamental. Pretende ademais dinamizar a Biblioteca Municipal e convertela nun referente habitual para os nenos e nenas e para as familias, nun esforzo por consolidar os hábitos lectores e culturais.

Máis historias de amor

2008-05-18T23:18:00.004+02:00

No Contomar de mañá, teremos máis historias de amor. A nova sesión do acollerá títulos fermosos como Un segredo do bosque (de OQO editora) ou o Discurso do oso (de Kalandraka). Estaremos, coma sempre, ás seis da tarde na Biblioteca Pública de Gondomar e será a penúltima sesión do Contomar, que rematará, como os anos anteriores, o derradeiro luns do mes de maio para volver en setembro. Lembrámoslles ás nenas e nenos que non esquezan selar os seus carnés para conseguir leóns.

Historias de amor

2008-05-12T00:48:00.003+02:00

Hoxe no Contomar teremos historias de amor: Amores de gato e rato, Sal e azucre, Sígueme! ou Hilderita e Maximiliano serán algúns dos textos que lles acheguemos aos nenos para falar do amor. Tamén celebraremos o cumprecontos dunha das nosas amigas, Ángela, coa historia de Coco e a lúa.

O cumprecontos de Emma

2008-05-05T23:32:00.006+02:00

Esta tarde celebramos no Contomar o cumprecontos de Emma, unha das nosas amigas que hoxe facía sete anos. Ela escolleu para celabralo A casa dos gatos: nós contámosllo, cantámoslle, pintámoslle unha bolboreta na cara e regalámoslle un conto, co desexo de que os libros e as historias camiñen sempre con ela.

Ademais do conto que Emma escolleu, xogamos e viaxamos polo mundo con Catarina, o Oso e Pedro e soubemos da experiencia difícil de ter unha irmá pequena con Un problema grande e Puag, que noxo!

Máis contos...

2008-04-28T00:27:00.007+02:00

Logo desta intensa semana de actividades organizada por Espazo Lectura, coa colaboración do Concello de Gondomar, para celebrar o Día do Libro, mañá teremos unha nova sesión do Contomar con máis contos: Petra, Tres desexos, Ollobrusco ou O abrigo misterioso serán algunhas das historias que nos acompañen.

Ademais, celebraremos o cumprecontos de David, un dos nenos do Contomar, que fai catro anos. Cantarémoslle, pintarémoslle a cara, farémoslle un agasallo e contarémoslle o seu conto preferido, O gato lambón.

Cantos contos!

2008-04-14T23:50:00.007+02:00

Hoxe 35 nenos e nenas participaron nunha nova sesión do Contomar pola que pasaron unha chea de contos: Orellas de bolboreta, Pétala, Un gato na árbore, Mariluz avestruz, Teño ganas de... e A noite das mudanzas. Todos estes contos foron desfilando baixo a atenta mirada do monstro peludo que, ao final, tamén nos quixo contar a súa historia cun rei e unha nena...

Cantos lobos

2008-04-06T22:13:00.005+02:00

Este próximo luns os contos de lobos serán os protagonistas do Contomar. Aproveitando os traballos que realizaron as nenas e nenos asistentes ao obradoiro de ilustración de Chus Ferrín e que inundan os espazo da biblioteca, no Contomar serán esta vez os lobos –bos e malos– quen tomen a palabra desde historias como Carapuchiña vermella, Loboferoz, ¿Quen lle ten medo ao lobo?, Os sete cabritos e Os tres porquiños. Chus Ferrín púxonos en contacto con eles a través do seu libro Unha de lobos. Así que seguimos con eles. ¡Cantos lobos!

Segundo aniversario

2008-04-01T02:07:00.005+02:00

O segundo aniversario do Contomar celebrouse onte na Casa da Cultura de Gondomar coa actuación especial de Migallas e unha gran afluencia de público.

Celebración no Contomar con Migallas

2008-03-28T19:23:00.008+01:00

O Contomar cumpriu dous anos o pasado mes de febreiro. Agora, o vindeiro luns 31 de marzo celebrarémolo. Será, coma sempre ás 18:00 horas, na Biblioteca Pública de Gondomar, pero esta vez contaremos coa actuación especial de Migallas Teatro e o seu espectáculo Cantacontos. En Espazo Lectura queremos celebrar deste xeito os dous anos do Contomar, dous intensos anos contando contos cada semana na Biblioteca Municipal de Gondomar. Moitas grazas a todas e todos os que acudistes a contar contos. Porque o máis fermoso do Contomar é que contan as nais e os pais. Moitas grazas a todas e todos os que acudistes a escoitalo. Entre toda e todos, fixemos que o Contomar sexa un referente da animación lectora no Val Miñor.
O Contomar do luns será unha sesión moi especial para este segundo aniversario. Esperámosvos.

Vacacións no Contomar

2008-03-14T00:35:00.009+01:00

Este pasado luns os nenos do Contomar souberon do medo que pasou Cocorico mentres Gato Pelado estiraba a pata para collelo e papalo, divertíronse vendo todas as cousas que Se eu fose moi alto podería facer, respiraron aliviados cando o león conseguiu o silencio que precisaba A tartaruga que quería durmir e cantáronlle "Parabéns para ti" a Noa e mais a Emma, dúas das amigas do Contomar que celebraron connosco os seus cumprecontos: Noa co seu conto preferido, O galo Quirico, e Emma co seu, A ratiña presumida.

Agora, logo de tanta actividade, o Contomar vai coller vacacións e regresará o luns, 31 de marzo, ás 18:00h, coa actuación especial de Migallas Teatro e o seu espectáculo Cantacontos. Celebraremos así todos xuntos que levamos xa dous anos contando contos cada semana na Biblioteca Municipal de Gondomar. Boas vacacións e até o 31 de marzo!

Contos para contar

2008-03-01T02:16:00.004+01:00

Pódense contar historias e pódense contar tamén números. Na sesión do Contomar do próximo luns 3 de marzo, imos contar historias con números. O Libro de contar, Manu, A cebra Camila, As once damas, Inventando números ou Ser quinto serán algúns dos álbumes que protagonizarán a sesión.

Non temos medo!

2008-02-21T23:46:00.004+01:00

Na próxima sesión do Contomar, o luns 25, ás 18:00h, na biblioteca municipal de Gondomar, imos falar dos medos infantís. Contos como O Papón, O monstro de Ricardo, Onde viven os monstros ou Comemedos hannos axudar a achegarnos cos nenos e nenas a este tema.

Contos de animais

2008-02-16T11:46:00.008+01:00

A próxima sesión do Contomar, o luns día 18, celebrarase en torno a libros que teñen diferentes animais como protagonistas: O zoo de Xoquín, Pequechos das terras polares, Pequechos da selva, O oso e o corvo ou Rita serán algunhas das historias que compartiremos cos nenos e nenas.
Ademais, celebraremos o cumprecontos de Anxo, un dos nenos do Contomar, que escolleu Cando Martiño tivo ganas de mexar na noite de Reis como o seu favorito.

O exemplo do Contomar

2008-02-11T02:36:00.000+01:00

As actividades e o blog do Contomar, organizadas por Espazo Lectura, son postas hoxe como exemplo polo xornal dixital de A Nosa Terra, que salienta a súa importancia fronte ao descenso de dous puntos dos índices de lectura en Galicia durante o último ano.

Crocodilos e xirafas no próximo Contomar

2008-02-07T23:37:00.000+01:00

O próximo luns 11, Luns, coma sempre ás 18:00h na Biblioteca Municipal de Gondomar, a sesión do Contomar abordará contos que teñen como protagonistas a crocodilos e xirafas. Reproducimos a nota de prensa:

O programa de fomento da lectura CONTOMAR, que organizan a ANPA As Pontes e o colectivo Espazo Lectura, celebrará o próximo luns unha nova sesión de contacontos na Biblioteca Municipal de Gondomar con historias de crocodilos e xirafas. A sesión comezará cun relato fantástico sobre o nacemento dos crocodilos e continuará logo cos tres volumes da serie de crocodilo e xirafa de Daniela Kulot: Crocodilo namorado, Unha casa á medida e Unha parella diferente. Incluiremos tamén na sesión o poema visual Crocodilo de Antonio Rubio e Óscar Villán.
Ademais celebraremos os cumprecontos de dúas nenas socias do Contomar e, ao remate da sesión, os nenos poderán pintar unha xirafa ou un crocodilo.
Logo do descanso do entroido, o Contomar retoma así as sesións semanais de contacontos que desde hai case dous anos celebra na Biblioteca Municipal nun esforzo por crear en Gondomar un espazo de encontro cos libros e a lectura que agora se complementa coa nova proposta do club de lectura compartida Lendo contigo.

Descanso de entroido

2008-02-01T23:14:00.000+01:00

Este próximo luns día 4 non haberá sesión do Contomar. Desexámosvos que gocedes do entroido e da variada oferta de actividades que estes días imos ter en Gondomar. Vémonos de novo o día 11 de febreiro.

Queremos a paz

2008-01-28T00:27:00.000+01:00

Esta semana celébrase o Día da Paz e desde o CONTOMAR queremos contribuír á necesaria reflexión sobre o que a palabra PAZ significa. Por iso este luns teremos na nosa sesión contos para a paz. Algunhas das historias levarannos a falar dos conflitos bélicos e as súas consecuencias (Flon-Flon y Musina , De como Fabián acabó con la guerra ou Un barco no ceo) e con outras achegarémonos a unha dimensión máis cotiá da paz, porque a convivencia pacífica é cousa de todos: O sorriso de Daniela, Os tres bandidos ou Palabra de crocodilo.

Miguel Vázquez Freire estará en Lendo Contigo

2008-01-25T01:06:00.000+01:00

Este próximo sábado 26 de xaneiro o escritor Miguel Vázquez Freire estará ás 12:oo horas na biblioteca municipal de Gondomar para participar na 2ª sesión do Club de lectura compartida Lendo Contigo, unha actividade de dinamización lectora que promoven Espazo Lectura e a ANPA As Pontes. O libro proposto para este encontro é Contos de Reis e de Nadal, aínda que se recomendaron tamén outros libros do autor.

Comentarios

2008-01-24T01:03:00.000+01:00

A consecuencia dalgúns cambios estruturais que levamos a cabo no blog do Contomar, perdéronse os comentarios que algunhas persoas deixaran nas distintas entradas. Pedímoslles desculpas a esas persoas e agradecemos a súa preocupación e colaboración.

O inverno

2008-01-20T19:48:00.000+01:00

Este luns, día 21 de xaneiro, a sesión semanal do Contomar vai ter como tema central o inverno. O libro do inverno vainos servir para comentar cos nenos e nenas as principais características da paisaxe e dos nosos hábitos cotiáns no inverno. Tamén nos acompañarán os contos O inverno do señor Oso, Pegadas xigantes e U-la neve? E para aqueles nenos aos que lles están a caer os dentes, Oso e o seu dente.

Ademais, para favorecer un mellor coñecemento da obra do escritor Miguel Vázquez Freire, que nos acompañará este próximo sábado, día 26, ás 12 da mañá, no Club de lectura compartida Lendo contigo, contaremos tamén dous dos seus contos para os máis pequenos: O robot que lle tiña medo aos nenos/O neno que lle tiña medo aos robots e María é maior.

Contos clásicos

2008-01-11T18:44:00.001+01:00

Logo das vacacións de Nadal, o programa de fomento da lectura CONTOMAR regresa este próximo luns á Biblioteca Municipal cunha sesión dedicada aos contos clásicos. "Carapuchiña vermella", "Os tres osos", "O galo Quirico" ou "Polgariño", xunto con novas propostas desas historias tradicionais como "A verdadeira historia de Carapuchiña", serán algúns dos contos que poderemos escoitar o próximo luns. Ademais, celebraremos o cumprecontos dunha das nenas do CONTOMAR que fai 4 anos.

Retomamos así o programa semanal de contacontos que, desde hai case dous anos, desenvolvemos na Biblioteca Municipal de Gondomar e que durante o primeiro trimestre deste curso contou cunha media de asistencia de 42 nenos por sesión.

Vacacións no Contomar

2007-12-21T14:34:00.000+01:00

O Contomar cesa as súas actividades desde o 17 de decembro (última sesión de contacontos do 2007 ) até o 14 de xaneiro de 2008.

Carta aos Reis Magos

2007-12-16T13:23:00.000+01:00

O próximo luns o programa de fomento da lectura CONTOMAR ofrecerá unha sesión de contacontos que terá forma de carta aos Reis Magos. A través de contos como "Nadarín", "Avós", "Unha manchea de bicos" ou "Onde os gardarei para que non se perdan", pedirémoslles cos nenos aos Reis Magos un mundo máis xusto e solidario, cun maior coidado da natureza e con máis amor e respecto entre as persoas.

A sesión incluirá, ademais, a celebración dun "cumprecontos" no que lle dedicaremos a unha nena que fai anos o conto "Un agasallo diferente" e rematará coa lectura do conto de Kiko da Silva "Cando Martiño tivo ganas de mexar na noite de Reis".

Con esta sesión, o programa semanal de contacontos CONTOMAR colle vacacións de nadal até o 14 de xaneiro.

A auga e as comidas no Contomar

2007-12-11T22:45:00.000+01:00

Logo da sesión especial con Berrobambán Teatro e o seu espectáculo Un conto que nin pintado, á que asistiron unhas 130 persoas que ateigaron as sala da Casa da Cultura, o Contomar volveu nestas dúas últimas semanas ás súas sesións habituais de contacontos na biblioteca.

O luns 3 a protagonista da sesión foi a auga. Coa axuda dos Bolechas e das tres xemelgas, falamos do necesaria e importante que é a auga para a vida (Os Bolechas queren saber que é a auga) e explicamos que debemos consumila con responsabilidade e que non debemos estragala (Os Bolechas rifan no cuarto de baño e As tres xemelgas, tres gotas de auga). Tamén houbo contos que nos achegaron a algúns animais e seres fantásticos que viven na auga, como os Gordibolas, que nos deixaron as súas historias e unha canción que cantaron entusiasmados os nenos e nenas do Contomar.

O luns 10 falamos das comidas, da importancia dunha alimentación variada, e falamos tamén dos nenos que comen ben e dos nenos que non comen tan ben... O marciano Marcial, Que tal, vexetal?, Conto para non comer, A eiruga larpeira, Conto para contar mentres se come un ovo frito ou A casa da mosca chosca foron algunhas das historias que nos acompañaron.

Berrobambán Teatro no Contomar

2007-11-22T19:27:00.000+01:00

Berrobambán Teatro actúa este luns no CONTOMAR

Luns, 26 de novembro, ás 18:00h, na Biblioteca Municipal de Gondomar

O próximo luns a Biblioteca Municipal de Gondomar acollerá a representación do espectáculo de animación á lectura "Un conto que nin pintado" da compañía Berrobambán Teatro, dentro da programación do proxecto de fomento da lectura CONTOMAR que organiza a Asociación de Nais e Pais As Pontes. Con esta proposta queremos enriquecer a oferta de actividades que promove o CONTOMAR e contribuír a reforzar o traballo de fomento da lectura que semana a semana, desde hai case dous anos, realizamos coas sesións de contacontos.

Un espectáculo de animación lectora

Neste espectáculo Berrobambán emprega o teatro como medio de achega á animación á lectura, pois a lectura enriquece o imaxinario do público infantil e crea unha ponte coa ficción indispensable para a creación artística. O xogo do teatro, a miúdo con claves de clown, recrea os procesos que compoñen a elaboración dun libro: o seu xermolo, a inspiración, a redacción, a ilustración, a edición, ata chegar ás mans d@s lectores/as. É un espectáculo de pequeno formato, case coreografidos entre un par de actores e moito, moito papel. O libro está presente non só na propia historia, senón tamén de forma físca nos obxectos, converténdose así no único e real protagonista do espectáculo.

O próximo luns viaxaremos aos soños

2007-11-18T11:58:00.000+01:00

O próximo luns, día 19, ás 18:00h, o programa de promoción da lectura CONTOMAR dedicará a súa sesión de contacontos ao mundo dos soños con libros como «O soño do osiño rosa», «Papá, por favor, consígueme a lúa», «Sacapenas» ou «La cabeza en las nubes». A través destas historias pretendemos reflexionar cos nenos sobre todo o que pode caber no mundo dos soños, desde as ilusións e as fantasías até os pesadelos e os medos, tanto que soñemos durmidos como que soñemos espertos. No remate da sesión os nenos poderán pintar as súas impresións sobre este tema ou sobre as historias que se van contar.

Cada un é como é

2007-11-17T11:44:00.000+01:00

O pasado luns falamos no Contomar de que «Cada un é como é», e fixémolo con contos, claro.
Sofía, a vaca que amaba a música, ¿Cal é a miña cor?, O patiño feo ou Si, son gorda foron algunhas das historias que nos permitiron reflexionar sobre a importancia de aceptar a cadaquén como é, porque todos somos diferentes. Tamén lemos un poema e cantamos. Coma sempre, pasámolo xenial...

Os chibos chibóns nas mans

2007-11-06T00:53:00.000+01:00

Un instante da última edición, hoxe, do Contomar.

Historias con animais

2007-11-01T21:57:00.000+01:00

O próximo luns, 5 de novembro, terá lugar na Biblioteca Municipal de Gondomar unha nova sesión de CONTOMAR, o proxecto de promoción da lectura que organiza a ANPA "As Pontes" do CRA Antía Cal. Nesta ocasión teremos como protagonistas diferentes historias de animais con contos como "Loboferoz", "O gato lambón", "O elefante que non era elefante", "Chibos, chibóns" ou "Os tres porquiños".

CONTOMAR chega así á 4ª sesión desta tempada con 61 nenos e nenas que se fixeron xa socios e unha asistencia de case 50 nenos na sesión da pasada semana, na que, ademais de contar historias sobre o outono, puidemos celebrar os dous primeiros cumprecontos.

O regreso á escola, tema do próximo luns

2007-10-19T00:28:00.000+02:00

O regreso á escola será o tema da nova sesión de CONTOMAR o próximo luns, con contos como "O primeiro día de escola de TEO", "Iago vai á escola" ou "Mila vai á escola", historias que nos permitirán reflexionar cos nenos e nenas sobre o cambio de hábitos que supón a fin do verán e o comezo das clases. Ademais, incluiranse outras historias como "A viaxe das bolboretas", "As fabas máxicas" ou "Os tres porquiños".

Será o luns, 22 de outubro, ás 18:00h, na Biblioteca Municipal de Gondomar.

Comeza unha nova tempada

2007-10-16T20:42:00.000+02:00

As sesións terán lugar todos os luns ás 18:00h, na Biblioteca Municipal de Gondomar. A Asociación de Nais e Pais "As Pontes", do CRA Antía Cal de Gondomar, retomou onte o proxecto de dinamización lectora CONTOMAR que inclúe, entre outras actividades, unha sesión semanal de contacontos para nenos e nenas de máis de tres anos na Biblioteca Muncipal.
A primeira sesión deste curso, que se celebrou onte coa asistencia de máis de 40 nenos e nenas, levou por título "Pasámolo ben, pero temos normas" e incluíu, ademais dun repaso das normas de uso da biblioteca, contos que trataban da importancia de mantermos comportamentos respectuosos, solidarios e amables cara aos demais como "A xoaniña rosmona", "Eduardo, o neno máis terrible do mundo", "O poliño da abelaira", "A casa dos gatos" ou "O sorriso de Daniela".

A actividade de promoción da lectura "Contomar" chega así á súa terceira tempada nun esforzo por ofrecer en Gondomar un espazo estable e educativo de encontro cos contos e coa lectura e por fomentar nos nenos e nenas o hábito de acudir á biblioteca pública. Ademais das sesións semanais de contacontos a cargo dun grupo de nais e pais, o proxecto incluirá tamén, como en anos anteriores, actuacións especiais e encontros con autores e ilustradores.

Manteranse tamén propostas como o carné de socio con estrelas semanais e os diplomas de asistencia para premiar a fidelidade dos nenos e das familias. Por último, este ano incorporaremos, ademais, a novidade dos "cumprecontos", sesións especiais nas que converteremos en protagonistas dos contos aqueles nenos e nenas que fagan anos.